أعلن الجهاز المركزي للتعبئة العامة والإحصاء عن أرقام جديدة تخص معدلات الجواز والطلاق في مصر سنة 2024، واللي وضحت تغير واضح في شكل العلاقات الزوجية خلال السنة دي.

الأرقام الرسمية كشفت إن عقود الجواز انخفضت في 2024، في الوقت اللي حالات الطلاق فيه ارتفعت بنسب ملحوظة مقارنة بسنة 2023.

حسب تقرير الإحصاء، عدد عقود الجواز وصل لـ 936,739 عقد سنة 2024، مقارنة بـ 961,220 عقد سنة 2023، يعني نسبة انخفاض حوالي 2.5%.

كمان معدل الجواز نزل لـ 8.8 لكل ألف بدل 9.1 لكل ألف عن السنة اللي قبلها، في المقابل، عدد حالات الطلاق ارتفع ووصل سنة 2024 لـ 273,892 حالة، مقارنة بـ 265,606 حالة في 2023 — يعني زيادة 3.1%.

وبقى معدل الطلاق في مصر 2.6 لكل ألف من السكان، وهو رقم أعلى من السنة اللي فاتت.

مين أكتر فئة بتتجوز وبتتطلق؟

الأرقام وضحت إن أعلى نسبة جواز عند الرجالة كانت في الفئة العمرية 25–30 سنة، البنات أكتر فئة بتتجوز كانت 20–25 سنة، أكبر نسبة طلاق عند الرجالة كانت بين 35–40 سنة، وعند الستات كانت بين 25–30 سنة.

ومن ناحية التعليم، أكتر فئة بتتجوز هما اللي معاهم مؤهل متوسط سواء من الرجالة أو الستات، التقرير أشار إن الجواز زاد في المدن بنسبة 1.7%، لكنه انخفض في الريف بنسبة 5.4%.

أما الطلاق، فزيادته في المدن كانت أوضح ووصلت 5.1%، وفي الريف الزيادة كانت بسيطة 0.5% بس.