اختارت إدارة معرض القاهرة الدولي للكتاب نجيب محفوظ كـ"شخصية العام" وده بمناسبة الاحتفال بمكانته العالمية، ومع ده أطلقوا مسابقة فنية جديدة تحت اسم "عالم نجيب محفوظ" لإعادة تصميم أغلفة بعض رواياته الشهيرة.

المسابقة هتبدأ من النهارده ولحد 27 ديسمبر، ومفتوحة للمواهب الفنية من سن 18 لـ45 سنة، والمشاركة عن طريق إرسال تصميم واحد جديد للروايات دي: (بين القصرين – قصر الشوق - السكرية – اللص والكلاب – زقاق المدق – بداية ونهاية – ميرامار – أحلام فترة النقاهة – خان الخليلى – السمان والخريف – الطريق – المرايا) مع 3 صور عالية الجودة توضح مراحل العمل من البداية للنهاية.

وهيتم إرسالهم على الإيميل ده: egypt@srs.ae واكتب في عنوان الإيميل  "مسابقة عالم نجيب محفوظ".

أفضل 20 تصميم هيتم اختيارهم للعرض في المعرض، وأفضل 5 هياخدوا جوائز مالية بتبدأ من 8 آلاف جنيه وبتوصل لـ 20 ألف جنيه، الفرصة دي تعتبر فرصة ذهبية لأي فنان شاب حابب يظهر موهبته في أكبر معرض للكتاب في مصر.