لو نفسك تسافر وتغير جو والميزانية بسيطة معاك متقلقش! وزارة الشباب والرياضة فتحت باب الاشتراك رسميًا للفوج التالت من رحلات قطار الشباب للأقصر وأسوان! ودي رحلات بتنظمها سنويًا.

الرحلة هتكون من يوم 19 لـ26 ديسمبر 2025، مدتها 8 أيام و7 ليالي، وبرنامجها مليان زيارات من الصوت والضوء في الكرنك لجزيرة النباتات، غير الجولات الحرة.

شروط الاشتراك: السن من 18 لـ45 سنة، والتجمع يوم الجمعة 19 ديسمبر في محطة مصر–رمسيس الساعة 3:30 العصر للتحرك بالقطار.

أما قيمة الاشتراك 2500 جنيه للفرد، ومفيش تبديل أسماء، ومفيش استرجاع للمبلغ لو حد اعتذر.

الحجز والتسجيل والسداد بيتموا أونلاين من خلال الموقع الرسمي للوزارة، والدفع لازم يكون بفيزا أو كارت بنكي، ومش مسموح بالسداد عبر إنستاباي أو المحافظ الإلكترونية.

والوزارة بتأكد على ضرورة قراءة الشروط كاملة قبل الضغط على "موافق" وإنهاء عملية التسجيل.

تقدروا تدفعوا تمن الرحلة من هنا.

رحلة سعيدة