بعض الناس بتحس إنها مش محتاجه منبه يصحيها! لإنها بتصحى في ميعادها بمكن كمان قبل ميعادها وقبل المنبه مايضرب! الناس دي مش خارقة للطبيعة ولا حاجة، بس في شويه تغيرات بتحصل في جسمهم، هتعرفوها في السطور الجاية..

حسب تقرير حديث نشره موقع (روسيا اليوم)، بيقولك ياسيدي إن الجسم بيبدأ قبل ميعاد الاستيقاظ بفترة يجهز نفسه للصحيان تلقائيًا، عن طريق تغيرات هرمونية طبيعية، أهمها انخفاض هرمون النوم وارتفاع هرمون اليقظة، وده بيخلي الشخص يصحى من غير ما يحتاج يسمع صوت المنبه.

وأشار التقرير إن الحالة دي بتكون طبيعية ومؤشر صحي كويس لو الشخص بيصحى حاسس بنشاط وراحة، وده معناه إن الجسم أخد كفايته من النوم وإن مواعيد النوم منتظمة.

لكن في نفس الوقت، حذر التقرير من إن الصحيان قبل المنبه مع الإحساس بالتعب أو الإرهاق المستمر ممكن يكون دليل على قلة عدد ساعات النوم أو سوء جودته، وده بيحتاج إعادة تنظيم مواعيد النوم أو تحسين العادات اليومية.

وأكد التقرير إن الحفاظ على مواعيد نوم ثابتة، وتقليل استخدام الشاشات قبل النوم، والابتعاد عن المنبهات في آخر اليوم، من أهم الخطوات اللي بتساعد على تنظيم الساعة البيولوجية وتحسين جودة النوم.