نشر محمد رمضان فيديو على إنستجرام أعلن فيه استبعاده من الغناء في حفل ختام بطولة كأس أمم إفريقيا، النهارده الأحد، اللي بتستضيفه المغرب.
وقال رمضان إنه منزعج من اللي حصل، خاصة إنه اتبلغ في اللحظات الأخيرة إن الغناء اتأجل للحفل الختامي، وبعدها اتلغى خالص، بسبب حملة على السوشيال ميديا بتقول: "إزاي فنان مصري يغني في افتتاح بطولة في المغرب؟".
رمضان وضح إنه كان متفرغ ومستعد، وسافر مراكش علشان يسجل الأغنية الرسمية للبطولة، وكان مبسوط بالمشاركة، لكن قرار استبعاده زعله جدًا، خصوصًا إن الجهة المنظمة ما اعتذرتش له بشكل رسمي، رغم إنه سجل الأغنية بالفعل!
قال كمان: "أنا بعت رسالة للشخص المسؤول في المغرب، وهو رد عليا بفيديو لـ عمرو أديب بيتكلم فيه عن مشكلة بعيدة عن الفن، أنا إيه علاقتي باللي حصل ده؟ وإيه علاقة الفن بالموضوع؟ أنا إفريقي وبشوف البطولة دي بطولة قارية، ولسه بحب وأحترم المغرب، لكن اللي حصل كان تصرف فردي ومزعج، ومالوش أي علاقة بيا".
