أوقات بيظهر في حياتنا أشخاص، بيحسسونا إنهم العوض اللي نستحقه، بس في لحظة الدنيا بتكشفلنا حقيقتهم، وبدل ما يكونوا السند بيكونوا وجع جديد هنحتاج نتعافى منه، زي قصة حسن "آسر ياسين" ونور "دينا الشربيني" في مسلسل "اتنين غيرنا"، ولإنها حدوتة بتحصل حوالينا كتير، تعالوا ندردش سوا في موقف نورمع حسن لما رفضت ترجعله بعد ما سابها، ونعرف إمتى ضروري نعمل زيها ومنرجعش للإكس حتى لو كنا لسه بنحبه ورجع ندمان!
متلغبط ومش عارف عايز إيه!
المشاعر والعلاقات مينفعش فيها غير الوضوح، والشخص المهزوز عمرك ما هتحسي معاه بالأمان والاستقرار، وطول الوقت هتكوني مستنيه منه موقف يصدمك، وغير كده مواقفه هتفقدك الثقة في نفسك، وهتيجي في بالك أسئلة من نوع هو أنا مش كفاية؟ فـ بلاش ترجعي للدايرة دي تاني.
بينهي علاقتكوا أون لاين
ده بقى المعنى الحرفي لـ "أنا مبعرفش أواجه"، غالبًا هيكون نرجسي وبيفكر بس يحمي نفسه من أي عتاب أو لوم أو إحساس بالذنب هيحسه لما يقعد معاكي، فـ الهروب عنده الاختيار المناسب، بالمناسبة هينهي معاكي ويسيبك غرقانه في أحزانك وهيكمل هو حياته عادي!
خانك وهنتي عليه
وهنا بنستدعي جزء من أغنية أنغام لتتر المسلسل لما قالت: "اوعى تكون زيهم اوعى تخون ولا اللي بينا عليك يهون"، الكلام شارح نفسه، بس حقيقي الخيانة بتكسر قلب الست ومبتعرفش تسامح أبدًا فيها.
عارف وجعك وداس عليه
العلاقات مش كلها نهايتها واحدة، ولكن لما تكوني قولتيله على نقط ضعفك، ووعدك إنه مستحيل يعملها بالظبط زي حسن لما وعد نور، هنا يبقى هو اللي صعب فكرة الرجوع عليكي، هو اللي اختار النهاية اللي مش هينفع يكون ليها بداية جديدة.
حبك أوي بس جرحك أوي
أصعب أنواع الإكسات هو ده، لإنه هتكوني متأكدة إنه حبك بجد من قلبه، وعمل عشانك كل اللي بتتمنيه، بس في لحظة عرف وقدر يسيبك ويسيب كل ده ويمشي عادي، هنا بقى صدمتك فيه بتكون أصعب ووجعها في قلبك أقوى.
