هو عيد الفطر إيه غير كحك وعيدية وخروجة حلوة وأفلام سينما ماتتنسيش! ولإننا عارفين خروجة السينما في العيد بيبقى ليها طعم تاني خالص، جمعنا لكم الأفلام اللي من المقرر عرضها بشكل رسمي خلال أيام العيد في السينمات، يالا نعرفهم.

"إيجي بست"

بتحكي الأحداث عن اتنين صحاب من حي المرج الشعبي شرق القاهرة، عندهم شغف بالسينما من صغرهم، فـ بيأسسوا موقع "إيجي بست"، واحد من أشهر مواقع عرض الأفلام المقرصنة في العالم العربي، ومع شهرة الموقع يواجهوا تحديات قانونية.

بطولة أحمد مالك وسلمى أبو ضيف، وبيشارك معاهم الرابر مروان بابلو في أول تجربة تمثيل ليه، تأليف أحمد حسني، وإخراج مروان عبد المنعم.

فيلم "سفاح التجمع"

مستوحى من جريمة سفاح التجمع، قصة قاتل ك بيستدرج ضحاياه في ظروف غامضة، وبيتخلص منهم بطرق بشعة، وبيتم القبض عليه.

بطولة أحمد الفيشاوي، صابرين، انتصار، رنا رئيس، سينتيا خليفة، مريم الجندي، وآية سليم. إنتاج أحمد السبكي، وتأليف وإخراج محمد صلاح العزب.

فيلم "فاميلي بيزنس"

عيلة بتدخل في سلسلة من الخلافات والمواقف الساخرة بسبب تضارب المصالح بين أفرادها، وده بيخلق مواقف كوميدية كتير خلال الأحداث.

بطولة: محمد سعد، غادة عادل، دنيا سامي، هيدي كرم، أحمد الرافعي، محمود عبد المغني، وأسامة الهادي، من تأليف ورشة 3Bros، وإخراج وائل إحسان، وإنتاج رشيدي فيلمز.

فيلم "برشامة"

داخل لجنة امتحانات الثانوية العامة، بيتوفى المراقب، وبيحاول الطلاب إخفاء اللي حصل علشان يكملوا الامتحان، وده بيخلق سلسلة من المواقف الطريفة.

بطولة هشام ماجد، مصطفى غريب، فدوى عابد، باسم سمرة ، طه دسوقي، من تأليف أحمد الزغبي، شيرين دياب، وخالد دياب ، ومن إخراج خالد دياب.