لو أنت من عشاق مشاهدة المباريات! فـ أكيد لاحظت إن بعض لاعبي كرة القدم بينزلوا الملعب بشرابات مقطوعة من عند عضلة السمانة، وكتير افتكروا إن ده بسبب الاحتكاكات أو إن الشراب اتقطع بالغلط. لكن الحقيقة مختلفة تمامًا.

تقارير صحفية إنجليزية وضحت إن بعض اللاعبين بيتعمدوا يقطعوا الشراب من منطقة عضلة السمانة، عشان يخففوا الضغط عليها خلال المباراة، خاصة إن مع المجهود الكبير، العضلة بيزيد فيها تدفق الدم وبتنتفخ شوية، ووجود فتحات في الشراب بيديها مساحة أكبر للحركة وبيقلل الإحساس بالشد أو الانقباض العضلي.

ومن أشهر اللاعبين اللي اشتهروا بالعادة دي Gareth Bale وKyle Walker، واللي ظهروا أكتر من مرة بشرابات مقطوعة خلال المباريات.

من الناحية القانونية، قانون كرة القدم لا يمنع اللاعبين من قص الشرابات، طالما إن معدات اللاعب الأساسية مطابقة للوائح، ومفيش أي جزء ممكن يسبب خطورة على اللاعب أو المنافسين.

وبحسب قوانين FIFA وIFAB، اللاعب لازم يلبس الشراب الطويل اللي بيغطي الساق، لكن مفيش مادة صريحة بتمنع عمل فتحات أو قص أجزاء من الشراب، لتحسين الراحة أو تقليل الضغط على عضلة السمانة.