يمكن العلاقات الكتير بقت أمر شبه عادي في زمننا، وعلشان نكون منصفين بطل الفيلم، مكنش بيدخل علاقات مش تمام، بالعكس كان بيتجوز أي ست تعجبه، ولكن برده مكنش بهدف الاستقرار، والاستهتار وقعه في أزمات كتير بعد جوازاته الكتير اللي هو مش فاكرها أصلًا، لدرجة إن نقطة تحول حياته كلها متوقفة على حاجة معينة عملها في جوازة من جوازاته بيدور عليها طول الفيلم.

شوفنا فيلم "ابن مين فيهم؟ مع أبطاله، وحبينا ننقلكم انطباعنا عنه وطبعًا كالعادة مش هنحرقلكم الأحداث:

1- الفيلم بيلعب على حقيقة معينة بيبحث عنها بيومي فؤاد أو "رشدي" ، وده يخليك قاعد مستنى لأخر مشهد علشان تعرف، ياترى ابن مين فيهم؟

2- مش هتلاقي تجميعة النجمات لذاذ دول في عمل واحد، رانيا يوسف، شيماء سيف، ويزو، زينة منصور، حاجة كده منتهى الطعامة.

3- مشهد وراء مشهد، كل واحدة من اللي اتجوزها بيومي فؤاد، بتنتقم منه بطريقتها أو نقدر نقول حسب وظيفتها أو إمكانياتها، (لما تتفرجوا هتفهموا قصدنا).

4- فكرة الراجل المزواج أو المتعدد العلاقات والزوجات، الفيلم ده هيلغيها، وهيخلي أي حد بيفكر يكون زي بطل الفيلم يفكر كذا مرة، ودي نقطة في صالح الستات، هتعجبهم أوي.

5- ناس كتير لما شافت برومو الفيلم، وقالوا إن نفسهم الفيلم يكون بنفس الضحك كده، بنأكدلكوا إن الفيلم في أحداث ومشاهد كوميدية مختلفة كتير هتعجبكوا.