اتكلم الفنان هاني رمزي بصراحة عن فكرة انتهاء نجوميته وتراجع مكانته كنجم صف أول وشباك تذاكر، وأكد إنه مش بيقلق من الموضوع ده، وإنه عايش حالة من التصالح مع نفسه والرضا عن حياته، بعيدًا عن حسابات الشهرة والنجاح الجماهيري.

وجت التصريحات دي خلال لقاء تليفزيوني، لما اتسأل هاني رمزي إذا كان بيقف قدام المراية ويسأل نفسه إذا كانت صلاحيته كنجم صف أول وشباك تذاكر انتهت، ورد قائلًا: «لا».

ولما اتسأل إذا كان السؤال ده بيخليه يحس بزيادة ضربات قلبه، أوضح هاني رمزي إن السؤال قاسي جدًا، وقال: «أصعب حاجة إنك تقول لفنان أو مبدع إنك في لحظة من اللحظات تنتهي».

وعن خوفه من الابتعاد عن النجومية أو فقدان بريقها، أكد إنه مش بيحس بالخوف ده، وقال: «لا، أنا متصالح مع نفسي، وعندي رضا مع النفس».

وأضاف إنه مش بيبص لحياته قبل الشهرة على إنها كانت أقل قيمة أو سعادة، وتساءل: «يعني أنا قبل النجومية هل كنت عايش وحش؟ هل كنت مش راضي عن نفسي؟»، مشيرًا إلى إنه يقدر يرجع لحياته قبل النجومية ويتعامل مع الموضوع بشكل طبيعي.

واختتم هاني رمزي كلامه بالتأكيد على إن الحياة بعيدًا عن الأضواء ممكن يكون فيها راحة وهدوء أكتر، موضحًا إنه شايف إن الناس اللي عايشين حياة عادية بعيدًا عن الشهرة ممكن يكونوا أكثر راحة واطمئنانًا، وقال: «ما بين الشهرة وما بين إني أكون إنسان عادي، أنا شايف الناس دي أحسن ومرتاحين وبالهم مرتاح وعايشين أفضل».