بمناسبة مشاركة فيلم "بنتك" في مسابقة آفاق السينما العربية بمهرجان القاهرة السينمائي الدولي بدورته الـ47، بتقدم المخرجة سارة الشاذلي حكاية شخصية عن علاقتها بوالدتها، المنتجة والمخرجة ماريان خوري، وبتفتح من خلالها نقاش عن الأمومة والغياب والإرث العائلي، والتوازن بين الشغف المهني والحياة الأسرية.
وإحنا في "كلام القاهرة" اتكلمنا معاها عن كواليس صناعة الفيلم، وكشفتلنا إزاي التجربة ساعدتها تفهم والدتها وتتقبلها بشكل أكبر، وتغير علاقتهم للأحسن.
يالا بينا نقرأ الحوار:
1- "بنتك" بيبدأ من حكاية شخصية جدًا، لكنه بيفتح بابًا لقضايا أكبر زي الأمومة والغياب والإرث العائلي.. إمتى حسيتي إن حكايتك مع والدتك لازم تتحول لفيلم؟
لما كنت في كوبا وبدرس كنت عاملة فيلم قصير، في اللحظة دي فهمت أن عندي نقص ما من أمي أو مشكلة ومش عارفه أحلها، وابتديت اكتب عن ده، كمان المخرجة بتاعتي قالتلي لازم أعمل فيلم طويل عن المربية بتاعتي، في البداية الفيلم مكنش عن أمي خالص كان عن المربية، وساعدني في ده إني كنت بصور مع أمي فيديوهات كتير عننا، من هنا بدأت ادخل شخصيات تانية وكانت البداية.
2- وأنتي بتستعدي تبقي أم، هل نظرتك لتجربة والدتك اتغيرت؟ وهل اكتشفتي جوانب في اختياراتها مكنتيش قادرة تفهميها وإنتي طفلة؟
سؤال لذيذ ومبسوطة أن حد سأله، في الأول كان عندي غضب ومكنتش فاهمة، بعدين فهمت وحسيت بأمي أكتر، كنت بشوف أمي شجاعة جداً، وبتدينا حرية، غير إنها عرفت تبقى شغالة في مجال السينما وتقوم بدورها كأم في نفس الوقت، دي حاجة صعبة جدًا، أنا مش عارفه هكمل فيها إزاي وأنا عندي بنتين دلوقتي.
3- خلال تصوير الفيلم، هل ظهرت وجهات نظر مختلفة بينك وبين والدتك عن ذكريات طفولتك؟ وإزاي تعاملتي مع اختلاف الذاكرة بين الأم والبنت؟
أه طبعاً كان في اختلاف بينا كتير، يعني لما كنا بنصور الفيلم كنت بقولها أنا مش فكراكي، مش حاسة أنك كنتي موجودة، هي استغربت جدًا لأن بالنسبالها عملت اللي تقدر عليه وأكتر بس كانت مستعده تسمع، واللي فهمته أنه مكنش عندها الوعي بأن وقتها معانا في طفولتنا مهم لينا، وعرفت كمان أنها محصلش معاها كده في طفولتها.
4- الأرشيف العائلي عنصر أساسي في "بنتك".. إزاي اخترتي الصور والمواد اللي دخلت الفيلم، وإزاي قررتي إيه اللي يظهر للجمهور وإيه اللي يفضل خاص؟
الأرشيف عند كبير وطويل وشخصي جداً، ومكنتش عارفه هل أنا بتأثر عشان دي عيلتي والناس هتتأثر زيي لما تتفرج ولا لأ! بس اللي ساعدني في ده المونتيرات اللي اشتغلوا معايا.
5- اشتغلتي مسؤولة عن الأرشيف في السينماتيك الفرنسي بباريس، فإزاي أثرت خبرتك في التعامل مع الأرشيف السينمائي على رؤيتك لأرشيف عائلتك؟
التجربة دي كبرت حبي لفكرة الأرشيف عمومًا، واكتشفت أد إيه مهم، كمان عندي حب للماضي وشكل كل حاجة زمان، وده فادني في الفيلم لأنه معظمه مواد مؤرشفة.
6- نشأتي في عائلة مرتبطة بصناعة السينما، ووالدتك من عائلة المخرج يوسف شاهين.. هل كان الإرث السينمائي بالنسبالك مصدر إلهام، ولا كان كمان مسؤولية لازم تكون ليكي بصمتك الخاصة بعيدًا عنه؟
في البداية كنت بواجه صعوبة إني جاية من عيلة سينمائية كبيرة، خاصة يوسف شاهين وشهرته العالمية، وهو عم والدتي، فـ كنت حاسة بضغط ومقارنة، ولكن مع الدراسة عرفت نوع السينما اللي بحبه، وعرفت عايزة أوصل إيه للناس عن طريق السينما، تجربتي مع السينما مش تجارية. ودائمًا بحاول يكون ليا رسالة اقدمها للناس من خلال السينما.
7- الفيلم بيطرح أسئلة عن التوازن بين الشغف المهني والأمومة والاستقلال الشخصي.. هل شايفة إن المرأة ممكن تحقق طموحها من غير ما تدفع علاقتها بأسرتها ثمنًا لاختياراتها؟
السؤال ده مهم وهو سؤال الفيلم أصلًا، وأنا مش عارفه أرد عليه، كمان المشكلة دي بتواجه كل الستات في العالم كله، وبالنسبالي هتشغل سينما لما أحس أني عندي حاجة عايزة أقولها، ولو مفيش أفضل اتشغل بحاجة بتاخد وقت أقل من السينما وأكون أم بتربي ولادها بطريقتها.
8- هل تصوير "بنتك" غير طبيعة علاقتك بوالدتك، ولا ساعدك تفهمي مشاعر وأسئلة كانت موجودة بينكم من زمان ومكنش فيه مساحة لمناقشتها؟
الفيلم غير علاقتنا للأحسن جداً، وبقيت متقبلاها جدًا وهي كمان، وبقينا بنتعامل بطريقة طبيعية، ولو مكانش بحبها مكانش نقضي ٦ سنين بعمل فيلم عنها، اتمنى الناس تشوف ده في الفيلم.
9- لو المشاهد خرج من "بنتك" وهو بيفكر في سؤال واحد عن علاقته بأمه أو أسرته، تحبي يكون السؤال ده إيه؟
يفكروا في علاقتهم بعيلتهم سواء (أم، أب، أخوات) حتى، لو في مواضيع عايزين يتكلموا فيها معاهم وخايفين من الرد، اتمنى الفيلم يشجعهم ويراجعوا أهاليهم عشان مايندموش بعد كده.
