بما إن النهارده 11 نوفمبر، اللي بيوافق اليوم العالمي للعُزّاب أو السناجل، واللي بدأت فكرته في أوائل التسعينيات بين طلاب جامعة نانجينغ في الصين، باعتباره يوم مخصص للاحتفال بالعزوبية، واختاروا تاريخ 11/11 لأن الرقم 1 بيرمز للشخص الأعزب.

وبمناسبة اليوم العالمي للعُزّاب، جمعنا لكم أشهر عزّاب الوسط الفني، واللي اختاروا يعيشوا من غير جواز، منهم اللي رافض فكرة الارتباط من الأساس، ومنهم اللي خاض تجارب وحاول يرتبط، لكن لسه محصلش نصيب.. تعالوا نعرف مين أشهر الفنانين العُزّاب في مصر، وإيه وجهة نظرهم في الزواج والعزوبية، حسب تصريحاتهم.

1- شريف مدكور

"أنا واحد عايش بحريتي ومش عاوز ألتزم بزوجة وأطفال، وربنا ما فرضش الجواز على حد".

2- محمد محيي

"مش رافض الزواج، لكن مش هتجوز غير لما أحب، محتاج إنسانة تكون بتحبني ومتفهمة شخصيتي، لأن التفاهم بالنسبة لي أهم من الشكل، وكل ما الواحد بيكبر بيزيد خوفه من تجربة الجواز والفشل فيها".

3- محمد شاهين

"أنا مش هتجوز، ولا حتى في خططي المستقبلية، أنا سعيد بحياتي وأنا عايشها لوحدي، ده غير إن شخصيتي صعبة وصعب ألاقي واحدة تتحملها".

4- أحمد عيد

"الزواج قدر مش نصيب، وفي فرق بين الاثنين، أنا أعزب وسعيت في موضوع الزواج ولكن كل محاولاتي باءت بالفشل".

5- تامر حبيب

"ما اتجوزتش لأنني شايف أن الزواج مؤسسة اجتماعية فاشلة، ومفيش حد مثال قدامي فتح نفسي على الجواز، وأنا مبسوط كده".