تخيل كده لو واحد صاحبك جابلك هدية زجاجة عطر بريحة الصنوبر الفواحة، الريحة اللي تاخدك على طول في حضن الطبيعة، بس المفاجأة إن مصدر الريحة دي مش الطبيعة خالص!
في واحدة من أغرب الابتكارات، معامل في مدينة إدنبرة عاصمة اسكتلندا البريطانية، اخترعت عطر فخم بريحة الصنوبر، لكن المادة الأساسية اللي فيه مش مستخلصة من الغابات، لا دي جاية من الكتل الدهنية اللي بتسد مواسير الصرف الصحي في المدن الكبيرة.
الكتل دي بتتجمع من شبكات المجاري، وبتتعمل لها عملية تدوير عشان يطلعوا منها مواد كيميائية بتتحول لمكون أساسي في صناعة العطر ده.
المكونات نفسها عبارة عن خليط من زيوت الطبخ، وبقايا المراحيض، وأكل الناس اللي بيرموه في الصرف، مش بس كده ده في شركة متخصصة بتطلع الكتل دي من المجاري وتبعتها لجامعة إدنبرة، وهناك بيعملوا عليها شغل كتير وبيحولوها لوقود حيوي.
السر في البكتيريا اللي بتشتغل على الوقود ده، وبتحوله لمادة ريحتها شبه الصنوبر، بعد كده بيضيفوا المادة دي لمكونات العطر التقليدية زي الكحول والمواد الحافظة، وفي الآخر يكون عندك عطر فاخر ريحته طبيعية جدًا، بس أصله؟ من فضلات الإنسان وبواقي أكله!