من وقت للتاني كده، بنحب نفكر نفسنا بزمن الـ "نوكيا" الجميل، أد إيه كنا رايقين، ونفهم بعض من رنة! في المقال ده، مش هنروح بعيد أوي، لكن جايبنلك دراسة حديثة، بتكشف عدد الهواتف الذكية "الموبايلات" اللي هتكون معانا في حياتنا.

شركة "نوكيا" عملوا استطلاع رأي على 2000 شخص من مالكي الهواتف الذكية، بمناسبة إطلاق خدمة جديدة صديقة للبيئة، ولقوا إن الشخص العادي البالغ، بيحصل على ما يعادل 19  تليفون لحد ما يوصل لسن الـ 63 سنة، كا عمر افتراضي كده علشان الدراسة.

اكتشفوا كمان إن كل مستخدم للهواتف، عنده حوالي جهازين محمولين، محتفظ بيهم احتياطي في الأدراج، مع إنهم برضه أكدوا إن  13 % من المشاركين، عندهم ضعف العدد ده، وبيمتلكوا 4 أجهزة أو أكثر.

وقالت النتائج كمان إن 29 % بس من مالكي الأجهزة المحمولة، أعادوا تدوير هواتفهم، قبل استبدالها بطراز جديد، وفي الوقت نفسه اعترف 2 من كل 5 يعني 41 %، بأنهم مش عارفين هيعملوا إيه بالموبايلات القديمة أصلًا؟ (بس ماشيين بمبدأ أهو أكيد هنحتاجها)