من الواضح يا جماعة إن الدنيا اتغيرت حوالينا وإحنا مش حاسين، حتى أسباب الخلافات الزوجية اللي بتوصل للطلاق اتغيرت هي كمان، والموضوع بقى يستحق التأمل والتعجب في نفس الوقت، الأكيد إن كل واحد أدرى بقصته وأزمته، إحنا بس هناخدكم جولة لمحكمة الأسرة علشان نعرف أغرب حالات خلع كانت ممكن تيجي على بالنا في يوم من الأيام.
لو بتحبيني أمضى!
قرر يزوج يتأكد من حب زوجته له بطريقة تقريبًا جت على باله هو في "بيت الراحة"، فا طلب منها توقع له كمبيالات بمبلغ تجاوز 600 ألف جنيه، رفضت وهربت من البيت، وبعد رجوعها مرة تانية الضغوط زادت عليها، لإن والدته دخلت في القصة وهي اللي شجعت ابنها على الطريقة دي، فا الزوجة في لحظة ضغط مضت على شيكات إثبات حبها.
الموضوع لسه ماخلصش، بعد كام يوم طلب الزوج من زوجته تمضي على تنازل بقائمة المنقولات، ولما رفضت هددها بإنه هيشتكيها بالشيكات اللي مضت عليها!
خطيبي السابق حضر فرحنا فا اطردت من بيتي!
بعد مرور أسبوعين بس على حفل الزفاف، الغيرة والشك سيطروا على أحد الأزواج، خاصة بعد حضور خطيب زوجته السابق فرحهم، وخناقته معاه، الزوج هجر زوجته بعد الموقف الأخير، وطردها من البيت وبدد حقوقها المادية، فا طلبت الخلع فورًا.
عايزة تخلعني علشان نفقة ألعاب وترفيه للأولاد!
اشتكى زوج ميسور الحال من سوء معاملة زوجته، بعد 6 سنين زواج عاشهم في عذاب علشان أطفاله، مش بس كده، قررت زوجته تخلعه لإنه رفض يخصص لأولاده مبلغ مالي للإنفاق على ألعابهم وترفيههم، رغم بإنه بيصرف عليهم شهريًا أكتر من 30 ألف جنيه.
رافض يدفع فلوس حلاقة ابنه!
أهمل أب في الإنفاق على ابنه في أبسط الأمور الحياتية، زي الحلاقة، ولما طالبته زوجته بفلوس علشان تحلق لابنهم، رفض وحصلت مشاكل كبيرة بينهم، وصلت للطلاق، لكن الأم هنا مسكتتش وطالبت المسؤلين في محكة الأسرة بإلزام الزوج على تخصيص ملبغ مالي نفقة كل شهر، أجرة حلاقة ابنهم الصغير.
زوجة تطلب زوجها في بيت الطاعة
المتعارف عليه في مجتمعنا إن الزوج هو اللي بيطلب الزوجة في بيت الطاعة، في حالة عدم إستجابتها له، ولكن هنا ولأول مرة لجأت زوجة لإنذار زوجها الطبيب بطاعتها، بعد ما قام هو بنفس الفعل، واتهمته بالتهرب من مسؤلياته وعدم الإنفاق عليها وعلى أولاده.
