في واقعة غريبة ومش معتادة خالص، شحنة ضخمة من شوكولاتة "KitKat- كيت كات" الشهيرة اختفت بالكامل في أوروبا، في واحدة من أكبر سرقات المنتجات الغذائية خلال الفترة الأخيرة.
القصة بدأت بشاحنة محملة بحوالي 12 طن من الشوكولاتة، كانت خارجة من مصنع تابع لشركة Nestlé في إيطاليا، ومتجهة لبولندا ضمن عملية نقل عادية جدًا، لكن خلال الرحلة، الشاحنة اختفت فجأة بدون أي أثر واضح، وكأنها اتبخرت.
الكمية المسروقة ضخمة جدًا، وبتوصل لحوالي 400 ألف قطعة شوكولاتة، وده رقم مش بسيط نهائي، خصوصًا إن القيمة التجارية للشحنة كبيرة، حتى لو المنتج نفسه استهلاكي.
وحسب تقارير إعلامية، التحقيقات رجحت إن عملية السرقة دي مش عشوائية، وتمت بتخطيط مسبق، لأن استهداف شحنة بالحجم ده محتاج معرفة بمسارها وتوقيتها.
التوقيت كمان لعب دور مهم في خطورة الواقعة، لأنها حصلت قبل موسم بيزيد فيه الطلب على الشوكولاتة في أوروبا، زي احتفالات عيد شم النسيم، وده بيخلي في احتمال كبير إن المنتجات المسروقة هتتباع في السوق السوداء أو تتوزع بطرق غير قانونية.
لحد دلوقتي، السلطات الأوروبية لسه ما أعلنتش عن المتورطين أو مكان الشاحنة، والتحقيقات مستمرة لمحاولة تتبعها، سواء من خلال كاميرات المراقبة أو بيانات النقل.
