عمرك كنت في تجمع في مكان مليان أشجار مثلًا، ولقيت نفسك فريسة للناموس دونًا عن كل اللي حواليك؟ لو كانت إجابتك: آه، اعرف إن القرص والهرش وكل المراحل اللي بتمر بيها دي، مش صدفة خالص، الناموس فعلًا مستقصدك أنت بالذات. كمل المقال علشان تعرف السبب العلمي.

قام مجموعة من الباحثين في جامعة "روكفلر" بنيويورك، بعمل تجربة بسيطة كده، وهي إنهم جابوا شرابات "نايلون"، ولبسوها لعدد من الأشخاص في إيديهم علشان تمتص رائحة جلدهم، وبعد كده حطوها في مصائد ناموس منفصلة، وبعدها قاموا بإطلاق ناموس كتير عليها.

النتيجة كانت إن الشرابات اللي جذبت عدد أكبر من الناموس، كانت لأشخاص جلدهم بيفرز مواد دهنية وأحماض ومركبات معينة، بعد تفاعلها مع نوع معين من البكتيريا المفيدة الموجودة على الجلد، بتعمل ريحة مميزة كده، في الآخر بتكون هي السبب الأساسي وراء كل ده.