أوقات لما بنطلب حاجه أونلاين بتجيلنا مختلفة شويتين، وفي الحالة دي بيكون قدامنا حل من اتنين يا بنتصل بخدمة العملاء وبنقدم شكوى، يا بنرضى بالأمر الواقع وبنقرر منتعاملش مع المكان تاني، وفي بعض الحالات الموضوع بيقلب ضحك وبنشيرها على السوشيال ميديا وبتبدأ الحفلة.

بس المرة دي إحنا قدام واقعة عجيبة يمكن ماسمعناش عنها قبل كده، اللي حصل إن سيدة في ولاية أوهايو الأميركية قررت تشتري وجبة دجاج من كنتاكي، وبعد ما الديلفري سلمها الوجبة ومشي، اكتشفت إنها 4 قطع دجاج بس وهي دافعة تمن 8 قطع، تسكت؟ لأ!

اتصلت بخط الطوارئ بمركز الشرطة القريب منها، وحكت لهم الحكاية وهي متضايقة جًدا، حاول الظابط اللي رد عليها يحتوي الموقف وقالها إن مشكلتها مش مصنفة على أنها حالة طارئة، والمفروض تقدم شكوى مدنية يعني بعيد قسم الشرطة خالص.

لكن مافيش فايدة، الست صممت يبعتولها عنصر شرطة لحد بيتها علشان يتأكدوا بنفسهم ويشوفوا الوجبة الناقصة 4 قطع! وفعلًا اتحرك فرد شرطة لبيت السيدة، وسمع شكوتها.

وبعد الليلة دي ما خلصت، أصدرت شرطة أوهايو بيان طلبت فيه من المواطنين إنهم مايتصلوش بأرقام الطوارئ إلا في الحالات اللي بتتطلب تدخل الشرطة.

حدث بالفعل.. زوج باع مراته واشترى بثمنها تليفون محمول ووجبة