مفيش شك إننا من أكثر الشعوب اللي بتعشق بلدها، أو بمعنى أدق بنموت في تراب البلد دي. ده خلى فريق "كايرو بوليتان" يفكر برة الصندوق حبتين، قاموا جمعوا تراب شوارعنا وعبوه في أزايز وعرضوه للبيع. آه والله زي ما بنقولك كده.

"تراب القاهرة" ده اسم محتويات الإزازة السحرية، مكوناتها حسب إعلان الموقع (زلط - رمال شمال افريقيا - بقايا عضوية - بقايا أكل ومشروبات (كشري، قشر لب، شاي) - حشرات - أعقاب سجائر - مسحوق عظام - نباتات متحللة - فضلات المواشي والحيوانات - شعر آدمي وحيواني - دهانات جافة)، وحاجات تانية غريبة وعجيبة.

طبعًا المنتج ده لفت انتباه مستخدمي السوشيال ميديا، وكمان سعره اللي هو 500 جنيه. واتعرض لموجة سخرية شديدة. والموقع كان وضح إنه هيعجب اللي بيقدروا قيمة الشيء المعنوية أكتر من المادية.  وكتب على الإعلان "هذا المنتج صنع في حب تراب القاهرة الذي لا نهاية له".