طول عمرنا بنشرب القهوة مظبوظة، سادة، زيادة، ومع الوقت ظهرت القهوة سريعة التحضير "النسكافية" ومشتقاته، وشوية ظهرلنا الآيس كوفي، كل ده كلام رايق يظبط الدماغ، الغريب هنا إن القهوة بيتحط عليها ملح! ده مش مقلب ولا حاجة ده كلام علمي بيقول إن طعمها بيكون لطيف، ماتيجوا نشوف إيه الحكاية.

كشفت دراسة علمية نشرتها مجلة "ساينس ألرت"، إن الملح بيخفي مرارة القهوة وكمان بيظهر طعمها بشكل أقوى، الفكرة ممكن تكون صادمة لناس كتير، لكنها مجربة وليها مؤيدين، بيستمتعوا بيها عادي خالص.

 بالمناسبة، الكافيين مش هو المركب المسؤل عن مرارة القهوة، لكنه في الحقيقة بيمثل 15% بس من مرارة القهوة، والمكونات التانية هي اللي بتمنح القهوة مذاقها المر، وبتزيد المرارة خلال عملية التحميص.

فلما تكون القهوة مرة أكثر من اللازم، سواء ده كان طبيعة نوع البن، أو لأي سبب تاني، جرب تضيف كمية قليلة جدًا من الملح بالتدريج مع التقليب الجيد، حتى لو مزاجك تشربها بـ سكر، هتلاحظ فرق كبير في الطعم.