غريب الحب مين فاهمة! قررت فتاة ترفع قضية على حبيبها علشان سبب غريب شويتين تلاتة بالنسبة لناس كتير، لكن بالنسبالها ماكنش ينفع يعدي ببساطة.
شوف يا سيدي، اللي حصل إن بنت اتفقت مع حبيبها يوصلها المطار علشان تحضر حفلة موسيقية، ويقعد مع كلابها في البيت خلال فترة غيابها، فا اتصلت بيه في اليوم السابق للسفر لكنه ماردش، وراحت عليها السفرية.
فقررت ترفع عليه قضية، وقالت في دعوتها إنها اضطرت تدفع ثمن تذاكر الرحلة، وإنه لازم يدفعلها تعويض، بالمناسبة الطرفين كانت بتجمعهم علاقة عاطفية لمدة 6 سنين ونص، لحد ما حصل اللي حصل.
القاضية في نيوزلندا رفضت دعوى السيدة، وكان ليها وجهة نظر تانية بتقول إن الوعد بين الطرفين موصلش لمستوى العقد، وعلشان يكون قابل للتنفيذ، ضروري يكون في نية لإقامة علاقة ملزمة قانونا، وإن النوع ده من الاتفاقات بيحصل كل يوم، والمحكمة مابتصدرش أحكام فيه.
