مش كل فكرة بره الصندوق، هاتتشاف كرييتف، بالعكس، ممكن تتقلب على صاحبها وتاخذه في سكة بعيدة خالص عن فكرته، ده اللي حصل مع مصمم الأزياء الياباني جون تاكاهاشي، صاحب علامة Undercover، واللي قدم اعتذار بعد عرض أزيائه الأخير.. بس ياترى ليه؟ تعالوا نعرف في السطور الجاية.

قدم المصمم خلال أسبوع الموضة في باريس، تشكيلة فساتين غريبة من نوعها، الجزء الأسفل منها شفاف مضئ ومنفوش بشكل دائري، وبيحتوي على زهور صناعية وفراشات حيّة، لموسم ربيع 2024.

الأمر معداش عادي كده، وغضبت منظمات مهتمة بالمعاملة الأخلاقية للحيوانات، وقال مصمم الأزياء إنه كان قلقان فعلًا على حياة الفراشات، وإنه طلبها من شركة بتتعامل بطريقة أخلاقية في تربية الفراشات، وتم منحها مساحة واسعة، علشان التنفس والتحليق، وبعد نهاية العرض، تم إطلاق سراحها في الحديقة.

وقدم اعتذاره لإنه حاصر فراشات كان المفروض تطير بحرية في السماء، ووعد بأنه مش هيستخدم الفراشات أو الحيوانات الحية تاني في تصميماته.