سنين وسنين والأطباء حول العالم، بيحاولوا يلاقوا حل لمشكلة ضعف البصر أو المحافظة عليه، فابتكروا عدسات النظارات الطبية، بعدها بكام سنة ظهرت طفرة عمليات تصحيح الإبصار. كلها أساليب سهلت حياة الأشخاص اللي بيعانوا من ضعف النظر. لكن الجديد بقى هو إنك هتقدر تستغنى عن نظارة القراءة خالص بنقطتنين بس من قطرة جديدة. طيب إزاي؟ هنقولك.
من ساعات، أعلنت هيئة الغذاء والدواء في الولايات المتحدة، إن استخدام قطرات العين "Vuity" هتحل مكان نظارات القراءة، ووصفتها بأنها "مغيرة للحياة"، وبكده هتلغي خالص الإحساس بالزغللة والصداع اللي ساعات بتسببه النظارات، وكمان هنرتاح من هم كسرها أو ضياعها، والابتكار الجديد يعتبر طفرة جديدة في تاريخ الطب.
تثبت فاعلية القطرة مع الأشخاص اللي أعمارهم بين 40 لـ 55 سنة، وبتقل فاعليتها بعد سن الـ 65. القطرة كمان هتساعد كبار السن وملايين الأشخاص اللي بيعانوا من عدم وضوح الرؤية القريبة المرتبط بالسن.
قطرة "Vuity" تم طرحها في الأسواق فعليًا، وبيبدأ مفعولها خلال 15 دقيقة، بعد وضع نقطة واحدة على كل عين، الأمر اللي بيوفر رؤية أوضح لمدة من 6 لـ 10 ساعات.
نتمنى نشوف المنتج العظيم ده في القاهرة قريبًا.
