في احتفالية نظمتها وزارة التضامن الاجتماعي، مؤخرًا، حصل موقف لطيف خلال قرعة على 12 متسابقة، معمولة أساسًا علشان رحلات عمرة، وخلال السحب اتسحب اسم سيدتين قبطيتين! ضمن العاملين في الحصر الشامل للحضانات.

وهنا كانت لحظة فارقة، فقررت الوزارة فورًا تديهم مكافأة مالية تعادل قيمة العمرة، احترامًا  للديانة وتقديرًا لمجهودهم الكبير في الحصر الوطني لدور الحضانات.

واحدة من الحاضرين قالت إن اللحظة دي كانت مؤثرة جدًا، خصوصًا إن اللي قامت بالسحب كانت هي نفسها مسيحية، وقالت إنها كانت بتتمنى السحب يكون باسم زميلة مسلمة.

الدكتورة مايا مرسي وزيرة التضامن الاجتماعي، أكدت إن اللي حصل بيعكس الروح المصرية، اللي عمرها ما بتفرق بين المصريين، وإن الوزارة بتكافئ الشغل والالتزام مش الديانة.