انطلقت فعاليات الدورة الخامسة من مهرجان السينما والفنون المصري الأمريكي في الولايات المتحدة، واللي هيكون السنة دي في أكتر من ولاية منهم نيويورك ونيوجيرسي وتينيسي، خلال الفترة من 31 أكتوبر لحد 4 نوفمبر 2025.

الدورة الجديدة للمهرجان هتكون باسم النجم الكبير عادل إمام تقديرًا لمشواره الطويل وتأثيره الكبير على السينما العربية، وهيتم خلال أيام المهرجان عرض باقة من أهم أعماله اللي أثرت في أجيال كتير وخلت اسمه واحد من أهم رموز الفن العربي.

كمان، هيتكرم اسم الفنان الراحل فريد شوقي خلال نفس المهرجان، وهتستلم ابنته رانيا فريد شوقي التكريم بالنيابة عنه، والفنانة الراحلة القديرة كريمة مختار، بجانب تكريم عدد من النجوم الحاليين زي: ليلى علوي، هاني رمزي، أحمد عبد العزيز، أحمد بدير، لبلبة، إلهام شاهين.

أما شعار الدورة الخامسة فهو "السينما من أجل الإنسانية"، في رسالة إن الفن مش مجرد ترفيه، لكن كمان صوت إنساني بيعبر عن الناس وقضاياهم.

القائمين على المهرجان قالوا إنهم مستمرين في دعم المشاركات العربية، خصوصًا المواهب الشابة، وتقديم منصة دولية تساعدهم يوصلوا صوتهم لجمهور جديد، مع التأكيد إن وجود مهرجان بالشكل ده في أمريكا بيمثل فرصة كبيرة لعرض الثقافة والفن المصري والعربي بشكل معاصر ومشرف.