"الحريفة 2" من أحدث أفلام السينما المصرية، جاي يكمل حلم شلة شباب من مناطق بسيطة، قدروا بسعيهم يوصلوا للعالمية.

إحنا في "كلام القاهرة" روحنا واتفرجنا على الفيلم مع أبطاله وعدد كبير مشاهير الفن والإعلام والرياضة في العرض الخاص، وهنقول لكم على 5 حاجات عجبتنا من غير ما نحرق لكم الأحداث:

1- فاكرين فلسطين، علم دولة فلسطين الحبيبة ظهر في خاتم كان لابسه "كزبرة" أحد أبطال العمل، وكمان الشال الفلسطيني ظهر في لقطة حماسية من أقوى مشاهد الفيلم.

2- ضيوف الشرف صحيح ظهورهم كان قليل، لكن أحمد فهمي كان ظهوره رايق، آسر ياسين وجوده كان محلي الأحداث، مروان موسى كان بشخصيّته وتلقائيته، أما أسماء جلال فـ كانت مفاجأة للحريفة نفسهم.

3- تشجيع الشباب بيعمل معجزات حقيقة، أحلام الحريفة اتحققت علشان وقع في طريقهم ناس، قررت تساعدهم وتديلهم فرصة، مشروع "حتة للكرواسون" و"شارك تانك" دليل على ده. (هتعرفوا قصدنا لما تشوفوا الفيلم)

4- الطموح حلو والنجاح مش شرط يكون في آخر الدنيا، لو عافرت جوه بلدك، بلاد الدنيا هي اللي هتجيلك وتحاول توصلك، وده بنشوفه في البطولة العالمية اللي لعبوها مع فرق كتير وعلى أرضهم.

5- روح الحريفة لسه موجوده، ورغم إن كل واحد فيهم راح في سكة غيرت خططتهم، لكن النهاية كانت زي ما هما عايزين.