بعد فترة طويلة من انتشار شائعة ارتباط دينا الشربيني وللإعلامي الإماراتي ورائد الأعمال أنس بوخش، أخيرًا خرجوا واتكلموا عن الموضوع بعد صمت.

دينا كانت ضيفة أولى حلقات برنامج After ABtalks اللي بيقدمه أنس في رمضان، وعلّقوا على الشائعة بطريقة لطيفة.

أنس بدأ الكلام وقال: "بهدلتينا"، فردت عليه: "أنا اللي بهدلتك؟!"، قالها: "لا، أنتِ ما بهدلتينا الصراحة، في حد صوّر، ولازم نوضح الموضوع".

دينا ردت: "احنا اتكلمنا بعدها، وضحكنا وقولنا مش هنقول حاجة لحد، بس عايزة أقول لك بقى إن المصريين كانوا مبسوطين جدًا، وبقينا نبعت الحاجات لبعض".

وأضافت: "أنا بحبه جدًا، وإحنا أصدقاء"، فأنس علّق: "أنا قبل العرض الخاص للفيلم والصورة كنت قابلتك بس مرة في حلقة جمعتنا، وبعدها في العرض".

أنس كمان شرح خط الأحداث وقال: "دينا عزمتني على العرض الخاص وأنا اعتذرت عشان كان عندي شغل، بعدين العزومة الثانية كانت من يسرا، وقالت لي: أنس لازم تيجي، فقلت لها: لا، أقدر ودينا سألتني، لكن في الآخر، مقدرتش أرفض دعوة يسرا، ورحت، وهناك طلبت مني أمشي معاها على السجادة الحمراء، فقلت لها إني مش فارق معايا، وغيرت مواعيدي عشان أجي، بس على حظي وصلنا في نفس الوقت، فإنتِ مشيتي قدام وأنا وراكي، وسحبت نفسي عشان متصورش معاكم، أنتوا الممثلين".

دينا كملت كلامها وقالت: "أنا وقتها لما كلمتك قلت لك نرد ونقول حاجة بدل ما الناس تتكلم كده، بس بعدين اتفقنا نسكت لحد ما الناس هتسكت وخلاص، وكنت قايلة إني مرتبطة بشخص من خارج الوسط".

حاليًا، دينا بتعرض مسلسل "كامل العدد 3"، وبيشاركها البطولة شريف سلامة، حسين فهمي، إسعاد يونس، إنجي المقدم، مريم الخشت، ميمي جمال، جيسيكا حسام، حمزة دياب، ولينا صوفيا، والمسلسل من تأليف رنا أبو الريش ويسر طاهر، وإخراج خالد الحلفاوي.