إمبارح، أحمد فهمي كان ضيف الإعلامي الإماراتي أنس بوخش في برنامجه "ABtalks"، اللي بيبث على قناته على يوتيوب، اتفرجنا على الحلقة وعجبتنا جدًا، وعرفنا جوانب كتير في شخصية فهمي وكمان اتكلم عن طفولته وزيجاته.
في السطور الجاية هنعرفكم على أهم 15 تصريح قالهم:
1- مش عارف أنا مين ولسه في رحلة البحث عن نفسي، وممكن أوصف نفسي بإني شخص بيبحث عن شئ وموصلش ليه.
2- حياتي عبارة عن "سمك لبن تمر هندي"، كلها حاجات ملهاش علاقة ببعض، وإحنا هنا في الحياة بنضيع وقت لحد ما نموت.
3- مطلباتي بسيطة جدًا، مش متطلع أوي، واعتقد ده سر قوتي، حتى سفرياتي معظمها في سيناء علشان الحياة هناك أبسط وشبههي.
4- ما ينفعش تزهق من الشخص اللي هتتجوزه، تخيل أنت بتعزمه على الغداء كل يوم، يعني لازم يكون صاحبك أكتر من أي حد.
5- الطلاق بالنسبالي أبسط شوية، مش معناه أن الناس مش غالية عندي لا خالص، أما خراب البيوت ده مصطلح جاهل جدًا، أنا اللي مضيت على عقد طلاق أبويا وأمي كان عندي 19 سنة، الحياة اللي كلها زعيق وقلة احترام مش مناخ صحي خالص للأطفال.
6- طلقت أول مرة وأنا عندي 33 سنة، وفي كل جوازاتي ما بيكونش في نيتي أطلق، بس هي الظروف وديتنا لكده، وأكيد العيب فيا أنا لو بنقول مين اللي غلطان أشيلها أنا، جايز أنا ملول وبزهق بسرعة.
7- معرفش أجامل وماليش في الشو الإعلامي، وأنا بتفرج على البرامج التليفزيونية بقعد أضحك على بعض الزملاء اللي بيمثلوا على الناس وبيظهروا عكس حقيقتهم خالص.
8- قللت دايرة معارفي جدًا بقالي سنتين، ومقدرش اتعامل مع شخص مؤذي مدى الحياة.
9- هربت من أهلى وأنا 19 سنة، قولتهم هسافر أمريكا سياحة بس مرجعتش وهناك اشتغلت في محل فاكهة، واعتمدت على نفسي وعرفت بعد كده أقدر حوجة الناس، وإني معاملش أي حد شغال معايا بطريقة وحشة.
10- عندي قلق لا إرادي ووجع في بطني طول الوقت من حاجات عيشتها، وتربية غلط كلها ضغط ومقارنات وحب مشروط، مش بلوم أهلي، لكن هما كانوا صغيرين ومعندهمش وعي دلوقتي.
11- اتأخرت في الخلفة علشان لحد دلوقتي مش عارف هتكلم مع ابني في إيه وإزاي؟ الطفل كائن خطر جدًا ولازم تكون جاهز ليه.
12- لو النهارده أخر يوم في حياتي، هكلم أخويا كريم علشان أوصيه على أبويا وأمي، ونفسي ميبقاش في دراما على فراقي.
13- بخاف من المرض، وبتمنى أموت وأنا بصحتى ومرهقش حد معايا، ومابفهمش مقولة خلف عشان ابنك يشيل اسمك بعد ما تموت، نفسي اعرف عشان إيه يحصل ما أنا هكون مت خلاص.
14- السوشيال ميديا شالت الستر من علينا، ستر حياتنا وكمان أفكارنا، جننت الناس وأنا مؤمن إننا متسيطر علينا بيها، وبطلت أرد على التعليقات السلبية علشان أثرت على شغلي.
15- هنا الزاهد إنسانة طيبة جدًا، وعلاقتها الكويسة بأهلها هي أول حاجة لفتت نظري ليها.
