في مداخلة هاتفية مع برنامج "القاهرة الآن" للإعلامية لميس الحديدي، صرح الفنان شريف دسوقي إن نجاح شخصية "عم سباعي" في مسلسل "بـ 100 وش" كان فضل من الله عليه، وشطارة المخرجة كاملة أبو ذكري.
وكشف "دسوقي" إن المخرجة كاملة أبو ذكري هي اللي رشحته للمشاركة في المسلسل، بعد ما شافته في فيلم "ليل خارجي" اللي اتعرض في مهرجان الجونة. ورغم إنه قدم خلال الفيلم تراجيدي، إلا إنها شافته في دور كوميدي للمسلسل. وده أول دور كوميدي له على مستوى الاحتراف.
وقال كمان إنه أصلًا مش ممثل كوميدي، وبدايته كانت في المسرح، كتابة وتمثيل وإخراج. واشتغل في مسارح مختلفة زي: مسارح قصور الثقافة - الفرقة المستقلة - البيت الفني للمسرح - صندوق التنمية الثقافية، وغيرهم. وإنه طول فترة الهواية اللي استمرت 25 سنة، كان بيلعب كوميدي وتراجيدي
عن الإيفيهات اللي استخدمها في المسلسل زي "يا نجوومية" و"فوق العظمة" و"لقمة حرام منظورة"، قال عم سباعي إنها ماكنتش مكتوبة. وإنه ابتكرها من خلال رصده للشارع، وكل حاجة بتحصل حواليه على مدار السنين. وأكد إن الناس حبت الشخصية لإنها حقيقية وموجودة في حياتنا وبنشوفها، شخص في الحياة مر بظروف مختلفة. مش مجرد شخصية في عمل درامي بس.
في النهاية أكد "الدسوقي" إنه مش هيكتفي بالأدوار الكوميدي، ووهيلعب أي دور مختلف يلاقيه مناسب له. وقال إن من خبرته في التمثيل على مدار السنين، بقى عنده مخزون كبير أوي نفسه يوصله للناس.
