طرحت الشركة المنتجة لفيلم "في عز الضهر"، البوستر المبدئي للفيلم اللي هيقوم ببطولته النجم المصري العالمي مينا مسعود، واللي من المقرر تواجده في القاهرة الفترة الجاية علشان يبدأ تصوير مشاهده مع باقي فريق العمل.

"في عز الضهر" هو أول تجربة سينمائية لـ "مينا" في مصر، والفيلم بينتمي لأفلام التشويق والإثارة. بيجسد "مينا" خلال الأحداث دور زعيم عصابة دولية، بيرتكب جرائم كتير حول العالم وبيقع في قصة حب مع واحدة من بطلات الفيلم، والفيلم من تأليف كريم سرور، وإخراج مرقس عادل.

"مينا" أو "علاء الدين" هو ممثل ومغني كندي من أصول مصرية، نال شهرة عالمية بعد تمثيله لدور البطولة في الفيلم الأسطوري "علاء الدين"، اللي شاركه فيه النجم ويل سميث، ومن بعدها حقق شعبية كبيرة رغم مشاركته السابقة في أكثر من مسلسل تلفزيوني وبرنامج، وشارك كمان بصوته في لعبة المغامرات "واتش دوجز".

ومؤخرًا احتل مينا المركز  الـ 44 في مسابقة "أوسم 100 وجه في العالم لعام 2020"، واللي بتنظمها "تي سي كاندلر" في لاس فيجاس بالولايات المتحدة الأمريكية، وبكده بقى المصري الوحيد في القائمة للسنة اللي فاتت.