الساعات اللي فاتت، رواد السوشيال ميديا تداولوا صورة بتأكد حذف كليب أغنية "60 دقيقة حياة" لأصالة، واللي تعتبر من أشهر أغانيها، وقالوا إن طليقها المخرج طارق العريان، واللي كان منتج الألبوم والأغنية هو السبب!

وبعد البحث، اتضح فعلاً إن الكليب اتمسح من يوتيوب بسبب مطالبة "العريان" بحقوق الطبع والنشر، رغم مرور حوالي 10 سنين على طرح الكليب، ورغم حذف الكليب، الأغنية نفسها لسه موجودة على يوتيوب بس من غير الفيديو.

في نفس السياق، العريان أكد إنه تواصل مع إدارة يوتيوب بنفسه وقدم لهم مستندات تثبت ملكيته للألبوم، فبدأت الشركة توقف الأرباح مؤقتًا لحد ما تتحقق من الأوراق.

وأكد كمان في تصريحات صحفية، إن لو يوتيوب أثبت ملكيته فعلاً، الأغاني هترجع تتعرض تاني، لكن الأرباح كلها هتروح له.

العريان كان بيحاول من 5 سنين يحل النزاع ده بشكل ودي، لكن بعد ما فشل قرر يلجأ للإجراءات القانونية، وقدّم المستندات ليوتيوب من 3 شهور، ومن يوم 8 يناير اللي فات، بدأت الشركة تبعت إنذارات للمنصات اللي بتعرض الأغاني.