زي فنانين كتير اختفوا عن الساحة الفنية بعد نجاح ونجومية، ظهر الفنان الشاب فادي خفاجة على حسابه الشخصي بـ تيك توك، في حالة قريبة للانهيار، بسبب قلة الأعمال المعروضة عليه.
اضطر الفنان الشهير من طفولته، للجوء لجولات تيك توك، كا وسيلة للحصول على الأموال والهدايا من المتابعين، لإنه مش لاقي شغل وقاعد في البيت. (حسب كلامه)
"يا مخرجين ومنتجين مصر، لو العبد لله بعد العمر ده كله مشتغلش في مسلسل واتنين وتلاتة، مين اللي يشتغل يا ولاد المهنة والأصول؟، دي كانت رسالة فادي لصناع المهنة، وأكد كمان إنه مهما الناس قالوا له متكلمش هيتكلم علشان ياخد حقه ويشتغل.
مش بس كده حاول أحد أخواته الاتصال به خلال اللايف، لكنه رفض التواصل معاه وقال: "بتتصل بيا ليه؟ هو أخويا ده وقف جانبي إمتى؟.
شارك فادي خفاجة في أفلام ومسلسلات ناجحة، منها "عائلة الحاج متولي"، "يوميات ونيس"، فيلم "خارج على القانون"، "أبو علي". بنتمنى وضع فادي خفاجة يتحسن ويرجع للشاشة تاني.
