تراث الأغنية المصرية مليان بالمعاني، بنغني تقريبًا لكل حاجة، حب، هجر، حنين، ومناسبات، وكمان عندنا أغاني في حب ابن الجيران، واللي غالبًا بيكون أول حب بنقع فيه، حب تفاصيله بذكرياته بتوديه في حتة تانية خالص. وفي المقال ده جمعنالكم 5 أغاني عن حواديت حب ابن الجيران:
"من حبي فيك يا جاري"
من أشهر الأغاني اللي اتغنت في حب ابن الجيران، غنتها حورية حسن ورقصت على نغماتها نعيمة عاكف، كتبها مرسي جميل عزيز، ولحنها الموسيقار محمد الموجي، وكانت ضمن أحداث فيلم "بحبك يا حسن"، الأغنية لسه عايشة معانا وبتتغني بتوزيعات عصرية عظيمة.
اسمعوها من هنا.
"مين قالك تسكن في حارتنا"
أغنية لذيذة وشقية، غنتها الدرلوعة شادية، مع إنها كانت مكتوبة في البداية لـ وردة، حققت نجاح كبير، بسبب خفة دم كلماتها وقتها، واللي كانت بتوصف حالة بنت بسيطة في حي شعبي بعد ما وقعت في حب جارها، وبتقول: "يجي أبويا يعوز فنجان قهوة أعمله شاي وأسقيه لأمي"، الأغنية من كلمات حسين السيد، وألحان محمد الموجي.
اسمعوها من هنا.
"بعد بيتنا ببيت كمان"
"بعد بيتنا ببيت كمان، حلو ساكن من زمان، ببتسمله لما أشوفه، يجري يدخل من كسوفه، لحد يعرف من الجيران"، كلمات صلاح فايز وألحان وغناء الرائع محمد فوزي، طبعًا واضح من كلماتها إن وراها قصة.
اسمعوها من هنا.
"ياواد ياساكن حينا"
بنت وقعت في حب جارها المشغول عنها، ومش قادرة تستحمل هجره فا بتقوله، "يا واد يا ساكن حينا مين اللي شاغلك عننا، في حد واخدك مننا ولا إنت ناسي حبنا"، غناء صباح، كلمات على الفقي، ألحان منير مراد.
اسمعوها من هنا.
"ساكن قصادي"
هنا بقى قصة حب من طرف واحد، مليان أحلام اتحولت لقصة حزينة في النهاية، غنتها نجاة، كلمات حسين السيد، ألحان محمد عبدالوهاب.
اسمعوها من هنا.