في حفله الأخير ضمن فعاليات مهرجان العلمين الجديدة، وجه الفنان أمير عيد رسائل قوية عن معنى النجاح والفلوس والشهرة بعيد عن الأرقام واللايكات.

قال أمير قدام الجمهور: "الأرقام عمرها ما كانت دليل إن الفنان جامد، اللي من جوه فاضي بيدور يملى نفسه من بره."

وكمل كلامه عن هوس السوشيال ميديا وقال: "الحاجات الرخيصة هي اللي بتتباع أكتر، والناس بقت بتتباهى بالعربيات والفلوس والساعات. أمي قالتلي: عمرك ما هتبقى غني إلا لو عندك حاجة الفلوس متشتريهاش."

أما عن الحفلات، فأكد إن الحكاية مش في عدد الجمهور، وقال: "حتى لو الحضور نص الناس أو 10 أشخاص،كنت هعمل الحفلة وهكون فخور، لأن الروح اللي بيدوهالي أهم من أي حاجة."

واختتم رسالته بكلمات واضحة: "المهم بالقيمة مش بالكم… أنا مش كيس شيبسي عشان أبيع أكتر، أنا فنان حر بعمل اللي بيحركني."