النهارده، 10 ديسمبر، بيحتفل الفنان محمود العسيلي بعيد ميلاده الـ 37. على مدار سنين قدر عسيلي يعمل شعبية كبيرة، بأغانيه المختلفة والمطرقعة. ورغم إن أغانيه ممكن في الأول تبان غريبة، لكن بعد فترة قصيرة بنلاقيها شغالة في كل مناسبة وأي مكان. والكل بيرقص عليها. 

وفي ميلاده تعالوا نبص مع بعض على أغاني عسيلي، اللي قلبت الدنيا لما نزلت:

1- مجنونة

دي كانت أول فرقعة عملها عسيلي، وخلت كل الناس تتكلم عنه. الأغنية وقتها كانت غريبة جدًا، شكل وكلمات الناس مش متعودة عليها. قولنا يومين وهتتنسي، لكن لحد النهارده بنغنيها.

2- تررم

اسم "تررم" الغريب اللي دوخ جيلنا كله علشان نفهمه. الشارع المصري كان بيتكلم عن "تررم"، بعد أغنية عسيلي.

3- تبات ونبات

كسر الدينا مع الفنانة بشرى في الدويتو ده. ماتنكرش إن كان ليها فرحة خاصة كده، لما تبقى بتتفرج على ميلودي، وتلاقيهم كاتبين الأغنية الجاية "تبات ونبات".

4- يا ناس

من أغانيه المجنونة اللي كلها فرفشة وانبساط. الأغنية تبدأ من هنا، والرقص يشتغل من هنا.

5- حلم بعيد

أغنية صيف 2018 اللي قلبت الدنيا. المزيكا واللحن والكلمات، كلها روعة. حقيقي كانت من أحلى أغاني السنة.

6- فرحة

دي خلاص بقت الأغنية الرسمية لأي فرح مصري. ده غير إن كليب الأغنية لوحده حكاية، بنستمتع كل مرة بنشوفه فيها.

يا ترى إيه أكتر أغنية بتحبوها لعسيلي؟ شاركونا في التعليقات.