النهارده بتحل الذكرى السادسة لرحيل الفنان الكوميدي يوسف عيد. واللي رغم صغر حجم أدوراه، إلا إنه كان بيسيب علامة في كل عمل يشارك فيه. مانقدرش ننسى نبرة صوته ولا أدائه، وطبعًا إيفيهاته اللي بتضحكنا طول الوقت وكل مرة زي أول مرة. فتعالوا نتعرف أكتر على حياته في السطور اللي جاية:

1- اتولد يوسف عيد في 14 نوفمبر 1948، واتخرج من الثانوية الأزهرية.

2- اتشهر بأداء الأدوار الكوميدية الصغيرة في أكبر الأفلام، منها: الناظر - أضحك الصورة تطلع حلوة - التجربة الدنماركية.

3- خضع لعملية جراحية في عينه اليمين، بعد ما كان بيعاني من عدم وضوح الرؤية بسبب المياه البيضاء.

4- العملية منعته من السفر لمهرجان الإسكندرية السينمائي الدولي، علشان يحضر حفل افتتاح فيلم "المسافر". اللي ظهر فيه كضيف شرف.

5- شارك الفنان فؤاد المهندس في مسرحية "علشان خاطر عيونك"، والفنان فريد شوقي في مسرحية "شارع محمد علي".

6- أعماله التليفزيونية كانت قليلة ومنها: رياح الشرق - الكبير قوي - مسيو رمضان مبروك أبو العلمين حمودة.

7- من أشهر الشخصيات اللي قدمها: الأستاذ زكريا الدرديري في فيلم "الناظر" - القهوجي في مسرحية "شارع محمد علي" - عبده الحانوتي في فيلم "جعلتني مجرمًا".

8- رحل الفنان يوسف عيد عن عالمنا في 2014، نتيجه أزمة قلبية مفاجئة. عن عمر 65 سنة.