اليومين اللي فاتوا، حصلت أزمة فنية بين المطربتين روبي وساندي، يمكن ناس كتير ماخدتش بالها منها، بسبب الاهتمام الكبير بمجموعة الصور الجرئية، اللي نشرتها روبي مؤخرًا وقلبت السوشيال ميديا، وقللت التركيز مع الأزمة الفنية اللي بنتكلم عنها.

ببساطة اللي حصل، إن جمهور روبي اتفاجئ بحذف مقطع فيديو نزلته من أغنيتها الجديدة "هشك بشك"، على قناتها الرسمية على يوتيوب، بعد وقت قليل من طرحها، مع إنها كانت طرحت برومو الأغنية على إنستجرام، وقالت للمتابعين يستنوها.

المنتج وليد منصور، كشف في تصريحات لبرنامج "إم بي سي ترينديج"، إن أغنية "هشك بشك" ملك شركته، وكان المفروض تغنيها روبي، لكن بعد انفصال روبي عن الشركة، رجعت الأغنية ليه مرة تانية.

واللي كتير مايعرفهوش هو إن الأغنية كانت عليها خلافات مع جهاز المصنفات، بسبب كلماتها، وده السبب اللي خلى "منصور" يغير اسم الأغنية لـ "في اللا لا"، وقامت الفنانة ساندي بطرح جزء من فيديو كليب الأغنية، بعد تصويره في فرنسا، قبل طرحها بشكل رسمي ليلة رأس السنة.

اتفاجئ "منصور" بطرح الأغنية بصوت روبي، بعد طرح برومو منها بصوت ساندي، فطالب إدارة اليوتيوب بحذف الأغنية، وشرح ظروف الأغنية وملكيته ليها، وبالفعل الأغنية اتحذفت. ولحد دلوقتي روبي ماتكلمتش خالص في الموضوع ده، بس اتصدرت التريند بصورها الجديدة.

لكن روبي وساندي مافيش بينهم أي مشاكل شخصية، وده اللي أكده شادي نور مؤلف الأغنية، وقال كمان "كلنا أصحاب وحبايب.. مافيش خلاف بين روبي وساندي.. مافيش أغنية اتباعت مرتين.. ماحدش سرب الأغنية نكاية في حد".

أغنية "في اللا لا" أو "هشك بشك" سابقًا، كلمات شادي نور، ألحان محمد يحيى، وإنتاج وليد منصور في أول تعاون له مع ساندي.