لو كنت من متابعي مسلسل "جعفر العمدة" لـ محمد رمضان، فأنت أكيد دخلت في حيرة بعد ما شوفت، مشاهد "فلاش باك"الفنانين لبنى ونس ومجدي بدر،  وشكلهم أصغر من عمرهم الحقيقي بحوالي 20 سنة! وأكيد كمان أول حاجة جت على بالك، إن المخرج استخدم فلتر سناب شات ولا حاجة خلال التصوير، بطريقة إحنا الجمهور مش عارفينها.

 والسر اللي استخدمه المخرج محمد سامي في المسلسل لتصغير ملامح الممثلين، هي خاصية عالمية اسمها "De-Aging"، بيتم استخدامها في الأعمال السينمائية  والتلفزيونية، من خلال مؤثرات بصرية بتحول ملامح الفنانين لملامح أصغر، بدل من الاعتماد على الطرق التقليدية لإخفاء علامات السن زي المكياج، حسب موقع "ذا جارديان" البريطاني.

تم استخدامها قبل كده في فيلم The Irishman"" على وجه النجوم العالميين روبرت دي نيرو وآل باتشينو، والنهارده بيتم استخدمها في مسلسل مصري رمضاني، في خطوة مهمة لتطور أدوات التصوير في أعمالنا.

مسلسل "جعفر العمدة" من تأليف وإخراج محمد سامي، وشارك فى السيناريو والحوار مهاب طارق، بطولة محمد رمضان، زينة، هالة صدقي، إيمان العاصي، مى كساب، منة فضالي، أحمد داش،ونجوم أكتر.. يعرض على قناة "دي إم سي" الساعة 10:15 بالليل، والإعادة  الساعة 5 الصبح والساعة 9:45 الصبح، وعلى قناة "إم بي سي 1" الساعة 8 بالليل.

تحية لمخرج "حضرة العمدة" على خروجه عن المألوف.