طرحت شركة "فري ميوك" لصاحبها المنتج نصر محروس، من ساعات، فيديو كليب أغنية "يا سمرا" للمطرب مصطفى شوقي وهو نجم جديد عمره الفني قصير، لكنه قدر يحقق شعبية كبيرة في وقت قياسي.

وعلشان مشوار مصطفى شوقي ماكنش سهل تعالوا نتعرف عليه أكتر:

1- بيغني من سنة 2003 ، وصدر له ألبوم في نفس السنة لكن قابلته صعوبات كتير منعته من التألق.

2-  الحظ بدأ يضحكله، في 2013، لما قابل الفنان حميد الشاعري واللي اقترح عليه يغني باللهجة الصعيدية، وفعلًا في 2015 سجل أغاني ناجحة زي "أنا مصر".

3- وبعد فترة قابل المنتج نصر محروس، واللي طلب منه يشتغل معاه لكن كملحن، وبعد فترة أعجب بصوته واقترح عليه يبدأ مشوار الغناء من تاني.

4- حقق شهرة كبيرة جدًا، بعد أغنية "ملطشة القلوب" والأغنية حققت أكتر من 33 مليون مشاهدة على يوتيوب.

5- في عز نجاحه وتألقه طرح كليب "إنتي عرقسوسي"، لكن عكس توقعاته اتهاجم من الجمهور بشكل كبير بسبب ظهور راقصة معه، وعلشان يرضي كل الأذواق طرح الكليب مرة تانية بس ظهر فيه لوحده من غير الراقصة.