بعد اشتعال الخلافات بينهم خلال الأيام اللي فاتت، انتهى الخلاف بين عمرو مصطفى ورامي صبري، واللي كان السبب فيه أغنية "يمكن خير" اللي غناها الأخير وحقتت نجاح كبير، الأمر وصل لحذفها من على موقع يوتيوب، بناء على شكوى قدمها عمرو بيتهم فيها رامي بسرقة لحن الأغنية من أغنيته "رقصة".

اتفاجئ عمرو مصطفى خلال لقائه في برنامج "أجمد 7" على راديو "نجوم إف إم"، بمكالمة هاتفية على الهواء من رامي صبري، قالوا فيها: "نفتخر بوجود عمرو مصطفى لكن مينفعش تختلف بطريقتك دي، ومينفعش تطلع تقول إني سرقت منك الأغنية، أنا دايماً بدافع عنك يا عمرو وبقول أنك أطيب واحد في الدنيا وانتوا فاهمينه غلط، ولحد إمبارح بدافع عنك رغم أنك وقفت أغنيتي على يوتيوب".

فكان رد عمرو عليه: "اعتذر لك يا رامي، لكن أنت المفروض تكتب أن أغنية (يمكن خير) لحن عمرو مصطفى ورامي صبري، وأنا أكتر واحد بدافع عنك، وحصل خير ومتفرحش الناس فينا".

وأعلن عمرو مصطفى إنه خلاص مش هيرفع قضية على رامي صبري والأغنية هترجع له، وأضاف "بحبه وبحب كل الفنانين ولكن مينفعش يبوظوا هيبتي في المزيكا".