وأخيرًا خلص شهر أغسطس وخرجنا منه بخير، شهر تحسه حد مسلطه علينا. حر جدًا وطويل، وتحسه 60 يوم مثلًا. معندوش رحمة. بس اللي بيصبرنا إن بييجي بعده أحسن شهور السنة، سبتمبر، وده حسب كلام العلماء. شهر طيب كده وهادي، لا حر أوي ولا برد أوي. ده غير حاجات كتيرة مبهجة بتحصل فيه تعالوا نعرفها:

- أغسطس خلص

حدث مبهج بنستناه من السنة للسنة، له فرحة كدة زي فرحة ليلة العيد. وده لإنه شهر طويل جدًا، أول ما يبدأ بتحس أنك دخلت في نفق مظلم مش عارف هتخرج منه إمتى.

- الجو لطيف

سبتمبر بيجي ومعاه نسمات هواء منعشة بنحس بها بالليل. والجو بيبدأ يبرد شوية يعني المود بيتغير للأروق. الحر بيقل وده بيبسط الناس اللي بتركب مواصلات كل يوم.

- أحلى وقت للمصيف

طول الصيف بتكون المصايف زحمة والأسعار غالية. لكن في سبتمبر ومع قرب الدراسة، بتبدأ الزحمة في المصايف تقل. وأسعار الإيجار كمان بتقل، وتزيد عروض التخفيض. ساعتها تعرف تظبط أحلى سفرية مصيف مع أصحابك، من غير دوشة وزحمة.

- دخول المدارس

الأمهات بتلاقي نفسها في شهر سبتمبر، لإنها على الأقل بتلحق تستمتع كام ساعة الصبح من غير زن الولاد. ورغم إن أيام المدارس مليانة مسؤليات لكن أمهات كتير بتستناها وكل واحدة وليها أسبابها.

- الشتاء والحب والحبّيبة

بما إن سبتمبر بيمهد لبداية الشتاء، يعني إحنا داخلين على موسم الرومانسية والعشق. كمان في نظرية علمية بتقول إن مشاعر الحب بتلتهب في الشتاء، وده له علاقة إن الليل بيكون طويل. يعني العشاق عندهم وقت كبير يحبوا في بعض براحتهم.