من يومين انطلقت أحداث مسلسل "تغيير جو"، بطولة منة شلبي، صحيح الحدوتة لسه في أولها، بس الأكيد إنها مختلفة عن الموجود، علشان كده شدتنا، وقررنا نشارككم انطباعنا الأول عنها، من خلال 5 ملاحظات على السريع.

1- أمير عيد وأغانيه 

"أنا بجري مني وبجري ورايا..  أنا بجري من حاجات قديمة جوايا"، تخيل لما تكون دي بداية تتر بداية المسلسل، أمير عيد بكلماته وألحانه وصوته المميز جدًا قرر يلمس حتت  جوانا، يمكن مش عارفين نوصفها، مش بس كده، جوه الحلقات هتلاقي صوته في خلفية المواقف الصعبة اللي بتمر يبها "شريفة" أو منة شلبي، هي بتسكت وهو بيوصف حالتها بالمللي "لا الزمان ولا المكان سامحين ومفيش وقت للمحبة والحنين".

2- الديكور واللبس والألوان

أول كادر في أول حلقة منة خطفت الكاميرا بشياكتها وببساطتها، تفاصيل المشاهد تشدك، وزوايا التصوير معمولة بفن، مريم أبو عوف مخرجة المسلسل، تقريبًا لحد دلوقتي موقعش منها تفصيلة، يعني مثلُا هتلاقي منة بعد ما بتنزل من عربيتها بتقفلها وبتتأكد من ده، التفصيلة دي رغم بساطتها، بس واقعية، ولو أنت متابع أعمال معينة من أول رمضان هتفهم قصدنا.

3- أداء الفنانة شيرين

الفنانة الكبيرة شيرين، بتقدم دور مدمنة وأم منة شلبي، شيرين طالعة على الشاشة من غير ولا نقطة ميكب، نظراتها وتعبيرات وشها أكتر من حقيقية،، نقدر نقول إنه دور عمرها، حرفيًا إحنا بنستنى مشاهدها علشان نستمتع بمصداقيتها، وبالمناسبة عندها لمسة كوميدي كده هتضحكوا.

4- لبنان وشوارعها وناسها

لو أنت من عشاق لبنان، فأنت أكيد زينا كنت مستنى "شريفة" تسافر، ده اللي حصل في حلقة إمبارح، وبوصلها حبينا البلد أكتر، ومحسناش إن البطلة في غربة مثلًا، كمان أهلها بيحبوا يساعدوا زي المصريين تمام، ولو رجعنا لقصة المسلسل فهي اتعرضت لحادث سرقة هناك، قلب كل خططتها وشكله هياخد الأحداث لحتة تانية خالص.

5- علاقتها بوالدتها

شريفة بتحاول بكل طاقتها تنقذ والدتها العنيدة من الإدمان، مع إنها أصلًا محتاجه اللي يسندها، وهنا الأدوار متبدلة يعني هتلاقي شريفة هي اللي بتقوم بدور الأم مع والدتها، هي اللي بتخاف وتحضن وتعالج وتطبطب وتدعم، الاتنين بيعانوا من هشاشة نفسية وصدمات، على فكرة المسلسل مش كئيب، لكن ممكن نقول إنه إنساني واقعي، بين اللايت والثقل بطريقة جذابة تشدك للي جاي.