وصل ديسمبر، شهر ماينفعش يعدي كده من غير ما نكتب عنه، دايمًا بنحس فيه إننا داخلين على مرحلة أحسن في حياتنا، بس سيبكوا من فكرة الورقة والقلم ونراجع نفسنا حققنا إيه من اللي كان نفسه نوصله في 11 شهر فاتوا، خلينا دلوقتي نودع 2022 بشوية روقان.
في السطور الجاية هنقولكم على 5 حاجات تعملوها قبل ما يخلص ديسمبر 2022:
1- جربت الإسكوتر؟
لو كانت الإجابة لأ؟ استعد يا معلم لجرعة أدرينالين هتظبطك، دلوقتي أماكن كتير في القاهرة، بتوفر السكوتر الكهربائي "Rabbit"، حمل الأبليكشن ودلع نفسك.
2- شوف الظواهر الفلكية
تعرف إن ديسمبر السنة دي، هيكون فيه أكتر من ظاهرة فلكية مبهرة، زي اقتران "القمر والمريخ"، هتحصل يوم 7 و8 ديسمبر، تقدر تشوفها الظواهر دي بعيونك في زي، "مرصد حلوان، مرصد القطامية، الجمعية المصرية لعلوم الفلك".
3- التمشية بالليل
ماتخليش الكسل يغلبك، حضر مج مشروبك المفضل، وبلاي ليست المزيكا اللي بتحبها، واستمتع بالهواء في شوارع المحروسة، ننصحك تتمشى في "الزمالك، مصر الجديدة، المعادي"، أو أماكن تانية على ذوقك، المهم تخرج وتشم الهواء.
4- اخرج الخروجة إياها
عارف أنت خروجتك مع أصحابك اللي بتفضل في مرحلة التخطيط بس دي؟ اللي بقالكوا غالبًا سنة إن ماكنش أكتر بترتبوا ليها، ده مشغول وده عنده شغل وده خالته بتغسل، يلا بقى كلمهم، ومش عايزينك تيأس.
5- استعد للكريسماس
أجواء الاحتفال بدأت تظهر في كل مكان،و طبعًا جه وقت الهدية، على قد ما تقدر افتكر أهلك و زمايلك في الشغل ولو بهدية بسيطة، هتفرق جدًا في الروح الحلوة ما بينكوا.
