أعلنت هيئة الأرصاد الجوية إن موجة الحر اللي بتشهدها البلاد، هتفضل مستمرة لحد آخر الأسبوع، ومع ارتفاع درجات الحرارة، بتزيد الآثار السلبية للتعرض للشمس، ومنها "ضربة الشمس"، واللي بيصاحبها أعراض مزعجة زي الصداع وضيق التنفس، والأمر ممكن يكون أصعب خلال ساعات الصيام.

وعلشان تحمي نفسك من ضربة الشمس في رمضان اعرف نصائح الأطباء، حسب ما نشر موقع "الكونسلتو":

1- ضروري تشرب كميات كيرة من المياه، على مدار الساعات بين الفطار والسحور، هترطب جسمك وتعوضه السوائل اللي فقدها في الصيام، مقدار المياه المناسب 8 كوبايات يوميًا.

2- قلل تناول مشروبات بتحتوي على كافيين في أيام الحر، لإنها هتزود إحساسك بالإرهاق، وهتخلي جسمك يفقد سوائل أكتر.

3- لو بتمشي مسافات طويلة في الشمس أو عندك مشاوير بالنهار، البس ملابس قطن فضفاضة بألوان فاتحة، وحاول يكون معاك "كاب" طاقية، علشان تحمي دماغك من الحرارة العالية.

4- بمجرد وصولك البيت، خذ شاور بارد، هيساعدك على الاسترخاء والتخلص من الأعراض المزعجة زي الصداع.

5- خلي بالك من درجة حرارة عربيتك، لو كانت مقفولة ساعات طويلة هتكون أعلى من بره، بالتالي متسبش أولادك أو حيوانك الأليف جواها.