الصن بلوك هو صديق خروجتنا في الصيف، بنحطه على بشرتنا قبل نزولنا بنص ساعة، وبنجدده كل ساعتين، لحد هنا إحنا تمام، لكن والأهم إننا نخلي بالنا من تاريخ الصلاحية الموجود على العبوة، سواء قبل ما نشتريها أو اللي موجودة عندنا في البيت، لإن بعد 3 سنين واقي الشمس بيفقد مفعوله ومستوى حمايته بيقل، فا بيضرنا أكتر ما بينفعنا.

ودي 3 أضرار ممكن تحصل لبشرتنا لو استخدمنا واقي شمس منتهى الصلاحية، حسب موقع "الكونسلتو": 

1- حروق الشمس 

لما بتنتهي صلاحية "الـ صن بلوك، بيفقد مفعول المكونات الموجودة فيه، اللي بتحمينا من الأشعة فوق البنفسجية، زي "أفوبينزون"، وبالتالي بيكون سهل عليها تخترق طبقات الجلد، وبتصيبنا بحروق الشمس لما بنستعمله.

2- حساسية الجلد

بمجرد ما تخلص صلاحية عبوة واقي الشمس بيتأكسد على طول، يعني خطورة الأمراض اللي ممكن تصيبنا لو حطيناه على بشرتنا بتزيد، وتبدأ تظهر حبوب في البشرة أو حساسية في الجلد.

3- تجاعيد

واقي الشمس مش بس بيحمينا من أشعة الشمس الضارة، لكن كمان بيأخر ظهور التجاعيد وبيعالجها، وده معناه إننا لو استخدامنا واقي شمس "بايظ"، فا كده بنعرض جلدنا للتلف، وكمان هتظهر علينا علامات الشيخوخة، زي التجاعيد.