الحضن لغة عالمية، بيعبر بيها الواحد عن مشاعره تجاه أي شخص. سواء حب، سعادة، أو حتى حزن. لكن اللي ماتعرفوش إن الحضن له فوايد صحية مهمة جدًا. تخليه روتين يومي ضروري في حياتك. والفوايد دي جسدية ونفسية. لكن لو بتفكر في حضن علشان بردان، روح شوفلك بطانية.

في السطور اللي جاية هنعرفكم على أهم 7 فوايد صحية للحضن. حسب ما نشرها "برايت سايد":

1- بيقوي المناعة

في دراسة أمريكية أثبتت، إن دعم الأشخاص بانتظام عن طريق الحضن، بيقلل فرص تعرضهم للأمراض. وده لأن الحضن بيقوي جهاز المناعة في الجسم.

2- بيحسن الجهاز العصبي

الحضن بينشط الجهاز العصبي، من خلال تقليل الإحساس بالوحدة، ومحاربة المخاوف الداخلية. وكمان بيساعد على زيادة الثقة في النفس.

3- مفيد لصحة القلب

أثبتت دراسة أجرتها جامعة نورث كارولينا، أن الحضن مفيد جدًا لصحة القلب. والأشخاص اللي بيحصلوا على أحضان باستمرار، بيكونوا أقل عرضة للإصابة بالضغط. وبالتالي بتكون حالة القلب والأوعية الدموية أفضل.

4- بيزود الإحساس بالسعادة

الأحضان بتزود الإحساس بالسعادة، بسبب زيادة مستوى هرمون "الأوكسيتوسين" في الجسم. ده الهرمون المسؤل عن السعادة. وأحيانًا بيتقال عليه (هرمون الأحضان). وتأثيره بيكون أكتر على السيدات.

5- بيقلل الإحساس بالألم

في دراسة أجرتها جامعة نيويورك، أثبتت إن الحضن بيخفف الألم. طبقوا الدراسة على عينة من المصابين بمتلازمة فيبرومياجليا (الأشخاص اللي بيعانوا من بألام مزمنة في العضلات)، وكانت النتيجة إن إحساسهم بالألم قل بنسبة كبيرة.

6- بيقلل الإحساس بالتعب 

الحضن لمدة 10 ثواني بس، بيقلل الإحساس بالتعب والإرهاق. وبيحسن الحالة النفسية بشكل كبير.

7- بيقلل الإحساس القلق الاجتماعي

بفضل هرمون "الأوكسيتوسين"، الحضن بيقلل إحساسك بالتوتر والقلق بشكل عام. جرب تحضن حد تعرفه لما توصل مكان جديد، هتلاحظ إن ثقتك بنفسك بتزيد، واجتماعيًا بتتعامل بشكل أفضل وأسهل مع الموجودين.