نشر الفنان محمد رمضان على حسابه بـ "إنستجرام"، مقطع فيديو من كواليس تصوير مسلسله الرمضاني "العمدة"، تسبب في شعور عدد من جمهوره بالضيق والغضب، اعرفوا ليه من السطور الجايةَ!
ظهر "رمضان"، وهو لابس الزي الصعيدي، وبيضرب شخص من الخلف بالقلم، خلال مشهد تمثيلي، لكن من الواضح إن البعض شاف المشهد من زاوية تانية بعيدة عن كونها مشهد فني، وبدأوا يكتبوا تعليقات من نوعية "شكل الراجل اللي بتضربه قدام عيلته إيه؟"، "فيديو مهين".
بعض المتابعين كمان شافوا إنه كان أفضل يتم تنفيذ المشهد من غير ضرب حقيقي ويتم استخدام تكنيك معين يخلي المشهد يظهر للجمهور وكأنه حقيقي، ودي حاجة بيقدر ينفذها كتير من المخرجين.
رمضان ماردش على التعليقات، بس نشر نفس الفيديو مرة تانية، لكن بشكل كوميدي في إشارة منه لماتش "الأرجنتين وكرواتيا"، والتعليقات برضه كانت فيها نوع من الغضب.
تفتكروا ممكن نشوف المسلسل من غير المشهد ده؟ أو إن المشهد يعيد تفكير ممثلين ومخرجين في طريقة تنفيذ مشاهد العنف؟
