السنة دي موسم السينما هيكون مختلف، خاصة بعد رجوع فنانين كانوا غايبين عنها، من جوني ديب في هوليوود، لياسمين عبد العزيز وهاني سلامة هنا.. فتعالوا نشوف كل واحد ناوي يرجع بـ إيه ويخطف قلوب الجمهور من تاني.

ياسمين عبد العزيز في "زوجة رجل مش مهم"

بعد 7 سنين غياب، ياسمين عبدالعزيز راجعة بقوة بفيلم جديد اسمه "زوجة رجل مش مهم"، وده أول فيلم ليها من بعد "الأبلة طم طم" اللي كان في 2018.

الفيلم بيشاركها فيه أكرم حسني ومحمد رضوان، ولسه جاري التعاقد مع باقي الأبطال، العمل من تأليف شريف الليثي، إخراج معتز التوني، ومن إنتاج شركة سينرچي للمنتج تامر مرسي.

هاني سلامة في "الحارس"

بعد أكتر من 10 سنين، هنشوف هاني سلامة على شاشة السينما، في فيلم جديد اسمه "الحارس"، واللي قصته ماشية في إطار اجتماعي تشويقي، بيشاركه في البطولة مرام علي، أحمد الرافعى، ومحمود ياسين جونيور، والفيلم من تأليف عمر عبدالحليم، وإخراج ياسر سامي.


آخر مرة شوفنا هاني سلامة في السينما كانت من 2011 في فيلم "واحد صحيح"، وشارك فيه نجوم زي رانيا يوسف، ياسمين رئيس، عمرو يوسف، وبسمة،

رامز جلال في "بيج رامي"

رامز جلال كمان راجع للسينما بفيلم اسمه "بيج رامي"، ومعاه مجموعة نجوم زي: نسرين أمين، هدى الإتربي، محمد أنور، محمود حافظ، محمد عبد الرحمن، الفيلم من تأليف فاروق هاشم ومصطفى عمر، وإخراج محمود كريم.

آخر فيلم لرامز كان "أخي فوق الشجرة"، اللي نزل في يناير 2023، وحقق أكتر من 15 مليون جنيه، وكان كوميدي اجتماعي رومانسي.

أحمد عيد في "الشيطان شاطر"

أحمد عيد راجع من تاني بفيلم جديد اسمه "الشيطان شاطر"، ومعاه في البطولة زينة وعبد العزيز مخيون، القصة من تأليف لؤي السيد، والإخراج لـ عثمان أبو لبن.