وحشتك خروجة السينما وعايز تعرف معروض إيه! السينما حاليًا بتعرض أفلام كل فيلم منهم بيقدم تجربة جديدة تستحق المشاهدة (وعن تجربة)، مابين الرومانسي والكوميدي والاجتماعي، أفلام قادرة تخطفك شوية لعالم تاني مع قصص ممتعة.

تعالوا نعرف أكتر عن الأفلام دي:

1- الدشاش

شخص نقدر نقول عليه ديكتاتور، عمل ثروة بطرق ملتوية، وفي لحظة من بيتنازل عن كل اللي بيملكه وبيندم على ظلمه للي حواليه، لما بيعرف إنه خلاص هيموت بسبب مرض خبيث، ولكن اللي مجاش على باله إنه أقرب الناس ليه، خدعوه خدعة دمرت حياته! هنسيبكوا تعرفوا إزاي في الفيلم، بطولة الفنان محمد سعد، باسم سمرة، نسرين أمين، نسرين طافش، خالد الصاوي، ونجوم أكتر، تأليف جوزيف فوزي، وإخراج سامح عبد العزيز.

2- الهوى سلطان

قصة حب عيشناها أو كنا شاهدين عليها، صداقة بريئة بتتحول مع الوقت لحب كبير وبنتهي بالزواج، بطولة منة شلبي، أحمد داود، أحمد خالد صالح، جيهان الشماشرجي، تأليف وإخراج هبة يسري.

3- الهنا اللي أنا فيه

كوميديا اجتماعية من نوع جديد علينا اليومين دول، واحدة بتجوز جوزها لصاحبتها الانتيم علشان تتطمن على بنتها، بعد ما بتعرف إنها هتموت، بتحصل مواقف مضحكة وغير متوقعة، وبتتغير الأحداث خالص، بطولة كريم محمود عبد العزيز، ياسمين رئيس، دينا الشربيني، تأليف أيمن بهجت قمر، وإخراج خالد مرعي.

4- الحريفة 2: الريمونتادا

الجزء التاني من فيلم "الحريفة 2" بيحكي عن شاب موهوب في كرة القدم، بيحاول يرجع لنجاحه بعد فترة من الفشل، وبيواجه صراعات كبيرة، الأبطال هما اللي كانوا في الجزء الأول: نور النبوي، أحمد غزي، كزبرة، وباقي الفريق، بجانب ضيوف الشرف: آسر ياسين وأحمد فهمي، تأليف إياد صالح، وإخراج كريم سعد.

5- بضع ساعات في يوم ما

بنشوف قصص حب متشابكة بتحصل خلال يوم واحد، وبتكشف الأحداث التحولات النفسية في كل قصة، بيشارك في البطولة، هشام ماجد، هنا الزاهد، مي عمر، محمد سلام، أسماء جلال، أحمد السعدني، أحمد الشرنوبي، من تأليف محمد صادق، وإخراج عثمان أبو لبن.

6- البحث عن منفذ لخروج السيد رامبو

فيلم كوميدي خفيف بيحكي عن مغامرة طريفة بين كلب ذكي وصاحبه، وبتقابلهم مواقف كوميدية مضحكة، بطولة عصام عمر، ركين سعد، وأحمد بهاء، تأليف محمد الحسيني، وإخراج خالد منصور.

7- المستريحة

شاهيناز، نصّابة محترفة بتحاول تسرق قطعة ألماس بمساعدة أولادها، وبيحصل بينهم مواقف مليانة ضحك وصراعات، بطولة ليلى علوي،  محمد رضوان، بيومي فؤاد، عمرو وهبة، مصطفى غريب، نور قدري ونجوم أكتر، تأليف محمد عبد القوي، أحمد أنور، أسامة حسام الدين، وأحمد سعد والي، وإخراج عمرو صلاح.

8- مين يصدق

بنت من طبقة مرفهة، بتتعرف على شاب نصاب، وتشاركه في عمليات النصب اللي بيقوم بيها، بطولة جيدا منصور، يوسف عمر، أشرف عبد الباقي، شريف منير، أحمد رزق، تأليف وإخراج زينة أشرف عبد الباقي.

يالا اختار فيلمك دلوقتي واستمتع بتجربة سينمائية ممتعة في أقرب دار عرض!