صحيح موسم أفلام عيد الأضحى لسنة 2025، لسه فاضل عليه شوية حلوين، لكن قولنا نفكركم بمجموعة من الأفلام الجديدة اللي بنسبة كبيرة، هتنافس في الموسم الجاي، وبتتنوع أحداثها بين الأكشن، والضحك، مع تاتش حكايات رومانسية هتاخدنا عالم تاني، فـ تعالوا نعرف أكتر عن  الأفلام المنتظرة وحكاويها ونجومها.

فيلم "المشروع X"

يوسف الجمال، عالم مصريات بيطلع رحله موت مع فريقه، من مصر للقاتيكان وأمريمكا اللاتينية للبحر النفتوح، علشان يثبت نظرية سر بناء الهرم الأكبر، وهل كان مقبرة؟ الفيلم مليان أكشن ومغامرات، بطولة كريم عبد العزيز، ياسمين صبري، وإياد نصار، وفنانين أكتر، إخراج بيتر ميمي.

فيلم "ريستارت"

القصة بتحكي عن مهندس شاب بيشتغل في تصليح الموبايلات وبيحلم يتزوج بنت من مشاهير السوشيال ميديا، لكن مشكلته إنه مش قادر يحقق حلمه وبتفشل محاولاته! الفيلم بيجمع بين الكوميديا والرومانسية، وبيعرض مواقف مضحكة ونصائح للشباب، بطولة تامر حسني، هنا الزاهد، وباسم سمرة، محمد ثروت، عصام السقا، ومن تأليف أيمن بهجت قمر وإخراج سارة وفيق.

فيلم "أحمد وأحمد"

مهندس ديكور شاب بيكتشف إن خاله شبهه تمامًا، بيلاقوا نفسهم في مواقف كوميدية وهما بيهربوا من عصابة كبيرة بعد ما تورطوا في مشكلة خطيرة، الفيلم مليان ضحك ومواقف غير متوقعة، بطولة أحمد فهمي وأحمد السقا، وبيشاركهم محمد لطفي، رشدي الشامي، جيهان الشماشرجي، حاتم صلاح، من إخراج أحمد نادر جلال.

فيلم "الجواهرجي"

بعد 28 سنة من تعاونهم في فيلم "صعيدي في الجامعة الأمريكية"، بيتقابل الثنائي محمد هنيدي ومنى زكي في فيلم جديد، الفيلم بتدور أحداثه حول جواهرجي بيواجه تحديات بسبب تصرفات زوجته الغريبة! من تأليف عمر طاهر وإخراج إسلام خيري، وبيشارك في بطولته كل من: أحمد صلاح السعدني ولبلبة وتارا عماد.

ده كان ملخص عن الأفلام، مواعيد طرحها ممكن تتغير، تابعونا علشان نقولكم على مواعيد العرض من المصادر الرسمية قبل ما تروحوا السينما!